Чонотой андуурч барьсан нохойг эзэнд нь буцааж өглөө

Энэ сарын 8-ны өдөр ХУД-ийн 15 дугаар хорооноос чоно барьсан тухай мэдээлэл цацагдсан. Тодруулбал, Цагдаагийн байгууллага “чоно”-ыг Нийслэлийн байгаль орчны газарт хүлээлгэн өгсөн бөгөөд МУИС-ын Биологийн тэнхмээр тодорхойлуулж, чоно биш нохой болохыг тогтоосон байна.

Өнгө зүсээрээ чонотой төстэй боловч толгой, хоншоор, нүдний өнгө, сарвуу зэргийг үндэслэн тодорхойлсон хэмээх мэдээллийг Нийслэлийн байгаль орчны газраас өгөв.

Улмаар БЗД-ийн иргэн Б 2018 оны есдүгээр сард алдсан нохойн зураг нь олон нийтийн сүлжээнд гэнэт “ЧОНО” хэмээн тавигдсаны дагуу холбогдох байгууллагад хандаж, нохойгоо нэхжээ.

Нохойтойгоо авахуулсан зураг, нохойны эзнээ таньж буй байдал, бичгээр гаргасан хүсэлт зэргийг нь үндэслэн нохойг эзэнд нь өнөөдөр хүлээлгэн өгсөн байна.

 

Leave a Reply

Your e-mail address will not be published. Required fields are marked *