Цэрэгт яваад 14 хоносон залуу дунд чөмөг нь хугарч, хагалгаанд оржээ

Ховд  аймгийн Зэвсэгт хүчний 123 дугаар ангид цэргийн албанд тавдугаар сарын 1-ны өдөр татагдан очсон 18 настай залуу “дунд чөмөг хугарсан” гэх оноштойгоор өчигдөр /2019.05.14/ яаралтай хагалгаанд оржээ. 

Зарим эх сурвалжийн мэдээлж буйгаар цэргийн биеийн байдал муу байгаа гэсэн мэдээлэл байна. Залууг өчигдөр 17.32 цагт онгоцоор цэргийн төв эмнэлэгт авчирсан байна.

Ингэхдээ Ховд аймгийн Зэвсэгт хүчний 123 дугаар ангийн дарга, салаан дарга нар цэргийг онгоцоор авч ирсэн бөгөөд ар гэрийнхэнд нь “Гүйж байгаад асфальтан зам дээр унаснаас болж бэртсэн. Залуугийн бэртэлд гадны нөлөөгүй шүү” гэж хэлсэн байна.

Харин ар гэрийнхнийх нь зүгээс тэдний хэлсэн тайлбарт итгэхгүй байгаа аж. Тэдний зүгээс шүүх, шинжилгээний байгууллагад хандан гэдгээ мэдэгдээд байна. Өнгөрсөн жил гэхэд цэрэгт татагдсан залуу дэглэлт даалгүй нас барсан бол бас нэг цэрэг буу хулгайлж, Тува улсын нутагт буудуулж, нас барсан байдалтай олдсон билээ.

Тэгвэл ердөө цэрэгт яваад 14 хонож байгаа залуу чөмөг нь хугарч, хагалгаанд орсон нь гадны нөлөөтэй байсан уу эсвэл санамсаргүй болгоомжгүй бэртэл байв уу. Ар гэрийнхнийх нь хувьд гомдолтой байгаагаа илэрхийлж, шүүх, шинжилгээний байгууллагад хандана гэдгээ мэдэгджээ.

Хүүгийн биеийн байдлыг тодруулахаар Цэргийн төв эмнэлгийн албаны хүнтэй холбогдоход “Хүүгийн биеийн байдал сайн байгаа. Бид эмчлэх ёстой хүнээ аваад эмчилгээг нь хийгээд явж байна. Хүүг эдгэрээд зүгээр болно гэдэгт бүрэн итгэлтэй байна” гэв.

Тэрбээр үүнээс өөр мэдээлэл өгөхөөс татгалзсан юм. Харин хүүгийн ар гэрийнхнээс лавлатал биеийн байдал хүнд байгаа гэдгийг хэлж байна.

source: news.mn

Leave a Reply

Your e-mail address will not be published. Required fields are marked *